Министерот за надворешни работи Тимчо Муцунски, на покана на украинскиот министер Андри Сибиха и високата претставничка на ЕУ Каја Калас, престојуваше во еднодневна посета на Лавов, каде учествуваше на Министерскиот состанок за формирање на Специјалниот трибунал за кривични дела од агресијата против Украина и на неформалниот состанок на Советот за надворешни работи на ЕУ.
Муцунски, како што соопшти Министерството за надворешни работи и надворешна трговија, бил единствениот министер од Западен Балкан присутен на настаните.
На состаноците била потврдена поддршката за Украина, нејзиниот суверенитет и територијален интегритет, како и за иницијативата за воспоставување правна одговорност за актите на агресија. Министерот Муцунски ја реафирмирал принципиелната поддршка на нашата држава, повикувајќи на итен и безусловен прекин на огнот од страна на Русија и на заеднички ангажман за постигнување праведен и одржлив мир.
Во рамки на посетата, министерот заедно со своите колеги им оддал почит на украинските херои на гробиштата „Lychakiv“ во Лавов.
Фото: МНРиНТ
