Лидерот на либанскиот Хезболах, Хасан Насралах, тврди дека сите беспилотни летала што денеска ги лансираше милитантната група влегле во воздушниот простор на Израел, наведувајќи дека нападот се одвивал според планот.
Насралах рече дека Хезболах немале намера да користат прецизни ракети во денешниот напад, но дека може да ги распоредат во блиска иднина.
Тој изјави дека ниту една прецизна или стратешка ракета на Хезболах не била оштетена во израелските напади врз Либан, пренесе Би-Би-Си.
Во телевизиско обраќање, Насралах рече дека одговорот на Хезболах на убиството на нивниот врховен командант Фуад Шукр на 30 јули во Бејрут е одложен поради неколку причини, вклучително и масовна воена мобилизација од страна на Израел и САД и да се даде шанса за успех во прекинот на огнот и разговорите за Газа.
Тој истакна дека Хезболах одлучил да не одговори на убиството на Шукра со гаѓање цивилни области и израелска инфраструктура.
Насралах вели дека Хезболах целел воена разузнавачка база на 1,5 километар од Тел Авив.
Хезболах претходно објави дека истрелал 320 ракети Качуша и беспилотни летала кон Израел.
Израелските одбранбени сили (ИДФ) соопштија дека околу 100 воени авиони „уништиле илјадници ракетни фрлачи на Хезболах“ на повеќе од 40 локации.
