НАТО веднаш реагираше и ги пресретна руските авиони што го нарушија естонскиот воздушен простор, изјави денеска портпаролот на алијансата на X-платформата.
„Ова е уште еден пример за неодговорното однесување на Русија и способноста на НАТО да одговори“, изјави портпаролот на алијансата.
Два италијански авиони Ф-35 полетаа од воената база Амари во Естонија откако радарските системи на НАТО открија присуство на руски авиони, што доведе до итна наредба за полетување.
Откако италијанските авиони Ф-35, кои летаа во режим „QRA“ (брза реакција), прелетаа покрај руските авиони, тие потоа се оддалечија.
Италијанскиот контингент, составен од авиони Ф-35 од 13-та ескадрила на 32-то крило од Амендола и постојано во висока готовност, е распореден во воздухопловната база Амари во Харџума, Естонија, за да обезбеди надзор на балтичкиот воздушен простор како дел од активноста за воздушен надзор на Источното крило на НАТО.
НАТО го оцени нарушувањето на естонскиот воздушен простор од страна на руски авиони како уште еден пример за неодговорното однесување на Русија и способноста на сојузниците да одговорат.
Како што претходно објави порталот Err.ee, три руски борбени авиони МИГ-31 влегле во естонскиот воздушен простор во областа на островот Ваиндло без дозвола и останале во естонскиот воздушен простор речиси 12 минути.
Авионите наводно немале планови за лет, а нивните транспондери биле исклучени.
Во времето на прекршувањето, авионите исто така немале двонасочна радио комуникација со естонските служби за воздушен сообраќај.
Естонското Министерство за надворешни работи го повика вршителот на должноста на Руската Федерација во Талин за да го изрази својот протест и да достави нота во врска со прекршувањето на воздушниот простор на земјата.
„Русија веќе го прекрши естонскиот воздушен простор четири пати оваа година, што е неприфатливо само по себе, но денешното прекршување, за време на кое три борбени авиони влегоа во нашиот воздушен простор, е невидено брутално“, рече естонскиот министер за надворешни работи Маргус Цачна.
Тој рече дека зголеменото тестирање на границите и агресијата од страна на Русија мора да се одговори со брзо растечки политички и економски притисок, пренесува Танјуг.
Порано овој месец, Естонија го повика рускиот вршител на должноста амбасадор во Талин во знак на протест откако руски хеликоптер МИ-8 го наруши естонскиот воздушен простор во близина на островот Ваиндло.
