Американскиот претседател Доналд Трамп нареди распоредување на Националната гарда во Лос Анџелес за да ги смири немирите предизвикани од рациите за имиграција.
Одлуката дојде по вториот ден немири во калифорнискиот град, каде што жителите на претежно латиноамериканскиот округ се судрија со агентите на федералната служба за имиграција и царина (ICE).
Солзавец и „помалку смртоносно оружје“ беа употребени за растерување на толпата во округот Парамаунт.
„До степен до кој протестите или актите на насилство директно се мешаат во спроведувањето на законот, тие претставуваат форма на бунт против авторитетот на Владата на Соединетите Американски Држави“, рече Трамп во наредба во која се вели дека единиците на Националната гарда „привремено ќе ги штитат“ службениците за имиграција.
Гувернерот на Калифорнија, Гавин Њусом, изјави на социјалните медиуми: „Федералната влада ја презема контролата врз Калифорниската Национална гарда и распоредува 2.000 војници во Лос Анџелес – не затоа што има недостаток на органи за спроведување на законот, туку затоа што сакаат спектакл“.
