Европската унија мора да ги поддржи напорите на американскиот претседател Доналд Трамп за постигнување мировен договор во војната меѓу Русија и Украина, изјави денеска во Брисел унгарскиот премиер Виктор Орбан.
Запрашан дали сè уште се противи ЕУ да и даде повеќе пари на Украина, Орбан им рече на новинарите: „Ние не го поддржуваме тоа“, објави Ројтерс.
„Како што разбираме, ЕУ треба да изврши една едноставна мисија, да ги поддржи напорите на претседателот Доналд Трамп за постигнување мир“, рече Орбан.
Претходно денеска, Трамп телефонски разговараше со украинскиот претседател Володимир Зеленски, откако вчера разговараше со рускиот претседател Владимир Путин.
Лидерите на ЕУ утре ќе се соберат во Брисел за да разговараат за конкурентноста и да преземат понатамошни чекори по вонредниот состанок на Европскиот совет на почетокот на овој месец, на кој ќе се разговара за неодамнешните случувања во Украина и следните чекори во областа на одбраната, пренесува Танјуг.
