Унгарскиот премиер Виктор Орбан писмено ги информираше лидерите на Европскиот совет за искуствата од мировните преговори во Украина, првата фаза од мировната мисија и планот на Унгарија, кој содржи реална проценка на ситуацијата и реални цели, како и соодветен распоред на акции, изјави политичкиот советник на унгарскиот премиер Балаш Орбан.
– Ако Европа сака мир и сака да има одлучувачки збор за решавање на војната и ставање крај на крвопролевањето, тогаш промената на курсот мора да се разработи и да се спроведе сега – изјави Балаш Орбан во интервју за „унгарски Немзет“.
Како што наведува тој, унгарскиот премиер на лидерите на членките на Европската унија им испратил предлози за начините за решавање на украинскиот конфликт врз основа на исходот од неговата мировна мисија, за време на која тој ги посети Украина, Русија, Кина и САД од 2 јули до 11 јули.
На прашањето дали зборува за планот на Орбан како да се постигне мир, Балаш Орбан одговори: „Да, тоа е всушност планот на Орбан, кој сега е на масата на секој премиер на ЕУ“.
– Нашиот пристап се заснова на реална проценка на ситуацијата, реални цели и соодветен распоред – рече советникот на претседателот на унгарската влада.
Според него, улогата на Унгарија како посредник не треба ниту да се прецени ниту да се потцени.
– Точно знаеме за што е доволна силата на земјата, а за што не, но од првиот ден на конфликтот бевме кредибилни претставници на мирот, единствени сме способни да преговараме со секоја страна. Самиот факт што овие средби се одржаа во интервал од две недели покажува дека Унгарија може да одигра сериозна улога во посредувањето – изјави советникот на унгарскиот премиер.
Тој вели дека сега задачата на Будимпешта е да се обиде да ги убеди членките на Европската унија во планот на Виктор Орбан.
Портпаролот на Кремљ Дмитриј Персков денеска изјави дека Москва не ги знае деталите за предлогот на унгарскиот премиер за решавање на украинскиот конфликт, што тој го испрати до лидерите на Европската унија.
– Секако, не знаеме за што е внатрешната кореспонденција во Европската Унија, па можеби има некои детали (предлози за решавање на украинската криза) кои не ги знаеме. Но, уште еднаш повторувам, општиот пристап на господинот Орбан ни е познат – рече Песков, а пренесува РИА Новости.
