Голем дел од пациентите со цистична фиброза сеуште го чекаат лекот „Трикафта“ кој за нив значи живот, се вели во прилогот на Канал 5. Тие се изреволтирани бидејки рокот од три месеци, кој што беше ветен за решавање на нивните проблеми изминува овој месец. Од асоцијацијата за цистична фиброза велат дека не им преостанува друг избор, освен да излезат на протест.
„За жал сеуште има еден статус кво со донесување на модуларната терапија за останатите пациенти и пациентите навистина се исплашени и револтирани бидејки се случи застој и молк на кој никој ништо не ни одговара што се случува до каде е процесот и што ние може да направиме за да ги забрзаме овие процеси бидејки сепак станува збор за човечки живот„ вели во прилогот на Канал 5, Ивана Атанасовска, претседателка на Асоцијација за цистична фиброза.
Во меѓувреме Министерот за здраство Фатмир Меџити уверува дека решение за пациентите ќе има за неколку недели. Најави и посебен центар кој ќе биде наменет специјално за пациенти со цистична фиброза, а не како досега да бидат третирани на детската клиника.
-Од првиот ден се зафативме со тој проблем. Сите подготовки веќе се при крај и за тоа во наредните недели ќе излеземе со комплетен предлог, конкретен центар кај ќе се лекуваат, најсовремен досега и тој проблем веќе мислам дека пополека ќе го решиме. “ -изјави Фатмир Меџити, министер за здравство.
Меџити изјави дека одлуката кој од пациентите ќе прима терапија, секогаш е на стручните кадри и на комисијата.
Од Асоцијата за цистична фиброза велат дека иако надлежните најавиле, тие се уште не вклучени во работните групи и комисиите кои треба да донесат конечно решение околу набавката на лекот „Трикафта“ но и околу планот за тоа како ќе се лекуваат болните од цистична фиброза. Според асоцијацијата, за сите 120 пациенти, државата мора да најде начин да го обезбеди лекот трикафта.
