Судот во Мисури вчера ја укина пресудата на човек кој одлежал речиси 28 години затвор за убиство за кое секогаш тврдел дека не го извршил. Кога окружниот судија ја изрекол новата пресуда, Ламар Џонсон (50) само ги затворил очите и благо одмавнал со главата. Сега тој планира повторно да се поврзе со семејството и да ужива во искуствата што му биле ускратени поголемиот дел од животот.

„Иако е радосен ден, треба да се напомене дека никој нема да му го врати сето она што државата му го одзеде. Ништо нема да му врати речиси трите децении што ги изгуби додека беше одвоен од ќерките и семејството. На судењето, доказите беа достапни за неговата невиност, но тие беа скриени или игнорирани од оние кои не гледаат никаква вредност во животите на двајца млади црнци“, рекоа неговите адвокати.

Џонсон бил осуден за убиството на Маркус Бојд во октомври 1994 година, кој бил застрелан пред неговиот дом од две маскирани лица. Џонсон од самиот почеток се залагал за својата невиност, велејќи дека во тоа време бил со својата девојка километри далеку од местото на злосторството. Додека Џонсон бил осуден на доживотен затвор, друг осомничен, Фил Кембел, се изјаснил за виновен во замена за намалена затворска казна од седум години.

Џонсон на сослушувањето во декември сведочел дека ноќта на злосторството бил со својата девојка, освен неколку минути кога ја напуштил куќата на пријател за да продава дрога неколку блокови подалеку од местото каде што била убиена жртвата. Неговата девојка во тоа време, Ерика Бароу, ја потврдила неговата приказна и додала дека убиството се случило премногу далеку за Џонсон да се врати дома во рок од пет минути.

Адвокатите кои работеле на ослободување на Џонсон го засновале својот случај на клучниот сведок кој го отфрлил своето сведочење и затвореник кој рекол дека тој, а не Џонсон, бил со Кембел за време на убиството. Џејмс Хауард (46) отслужувал доживотна затворска казна за убиството и неколку други злосторства што се случиле три години по убиството на Бојд.

Тој на рочиштето сведочел дека тој и Кембел решиле да го ограбат Бојд, кој на еден од нивните пријатели му должел пари од продажба на дрога. Тој исто така рече дека Џонсон не бил на местото на злосторството. Хауард рече дека пукал во Бојд во задниот дел од главата и вратот, а Кембел во страна.

Хауард и Кембел пред неколку години потпишале заедничка изјава во која го признале злосторството и потврдиле дека Џонсон не бил вмешан. Кембел во меѓувреме починал. Џејмс Грегори Елкинг во декември сведочел дека бил пред домот на жртвата со Бојд, обидувајќи се да купи кокаин, кога двајца вооружени мажи облечени во црни маски за скијање дошле до куќата и го нападнале Бојд.

Елкинг, кој подоцна поминал неколку години во затвор за грабеж на банка, првично и кажал на полицијата дека не може да ги идентификува напаѓачите. Сепак, тој се согласил да ги разгледа потенцијалните осомничени. Елкинг тогаш го именувал Џонсон како еден од напаѓачите, подоцна велејќи дека бил принуден да го стори тоа. Двајт Ворен, кој го истражувал Џонсон во 1995 година, рекол дека освен сведочењето на Елкинг, главниот доказ против него бил разговорот во затворската ќелија.