ПОРАДИ 300 МИЛИЈАРДИ ДОЛАРИ ДОЛГ: Судот во Хонгконг нареди ликвидација на кинескиот гигант за недвижнини „Evergrande“

Судот во Хонгконг нареди ликвидација на презадолжената кинеска градежна компанија „Evergrande“, што сигнализира продлабочување на кризата на кинескиот пазар на недвижности. Дури и по повторените судски наредби, компанијата не достави план за реструктуирање на долгот, а судијката Линда Чан заклучи дека „чекањето е завршено“.

Судската постапка беше покрената на барање на инвеститорот на „Evergrande“, „Top Shine Global“, кој во јуни се пожали на судот дека „Evergrande“ не ја исполнил својата договорна обврска за откуп на акции.

„Evergrande“ има акумулирано повеќе од 300 милијарди долари долг и ја отсликува кризата во кинескиот пазар на недвижности.

Извршниот директор на „Evergrande“, Шон Сиу, ја нарече одлуката на судот „жална“, додавајќи дека компанијата ќе продолжи да работи во Кина. Имено, филијалата во Хонгконг е независна од операциите во Кина, нагласи Сиу во изјавата.

Во моментов не е јасно како пресудата ќе влијае на изградбата на станови од „Evergrande“, но кризата ја одложи испораката на клучевите на многу купувачи на станови, се истакнува во прилогот на BBC.

Пекинг се обидува да ја смири загриженоста на јавноста во врска со станбената криза, бидејќи граѓаните на социјалните мрежи како што е Weibo го изразуваа своето незадоволство од градежните компании како „Evergrande“.

Секторот на недвижности, исто така, го кочи економскиот раст на Кина, со оглед на неговиот удел од 25 отсто во бруто домашниот производ, истакнува BBC.

Пред пресудата во Хонконг, кинескиот Врховен суд и Министерството за правда на Хонгконг потпишаа договор за меѓусебно признавање и извршување на граѓански и трговски пресуди. Но, експертите сѐ уште не се сигурни дали договорот, кој стапи на сила во понеделникот, ќе влијае и на налогот за ликвидација на „Evergrande“.

Најголемите доверители на „Evergrande“ се заемодавците во Кина, кои имаат само ограничени правни можности да бараат поврат. Странските доверители можат да поднесат барања пред судовите надвор од континентална Кина, а некои го избраа Хонгконг, каде што се наведени акциите на „Evergrande“.