Поранешен израелски министер за одбрана Моше Јалон го обвини Израел за воени злосторства и етничко чистење во Појасот Газа, што наиде на остри критики од владините претставници.
Моше Јалон, поранешен генерал, за израелските медиуми изјави дека тврдокорните во екстремно десничарската влада на премиерот Бенјамин Нетанјаху сакаат да ги протераат Палестинците од северниот дел на Газа и повторно да воспостават еврејски населби таму.
„Принуден сум да предупредам за тоа што се случува таму и што се крие од нас“, изјави Јалон за израелскиот јавен радиодифузер Кан во неделата.
„Таму, на крајот на краиштата, се вршат воени злосторства. Јалон е поранешен началник на Генералштабот на армијата, кој беше министер за одбрана под Нетанјаху од 2013 до 2016 година и оттогаш е жесток критичар на премиерот. Партијата Ликуд на Нетанјаху го обвини за ширење „клеветнички лаги“, додека министерот за надворешни работи Гидеон Сар, шеф на помала десничарска партија, рече дека неговите обвинувања се неосновани.
„Се што прави Израел е во согласност со меѓународното право и срамота е што поранешниот министер Јалон не ја сфаќа штетата што ја направи и не ги повлече своите забелешки“, изјави Саар на конференцијата на весникот „Израел тудеј“.
Меѓународниот кривичен суд (МКС) минатиот месец издаде налози за апсење на Нетанјаху и неговиот поранешен шеф на одбраната, Јоав Галант, за наводни воени злосторства и злосторства против човештвото во конфликтот во Газа.
Нетанјаху и Галант ги негираа обвинувањата, а во одвоено интервју за Демократската телевизија во саботата, Јалон предупреди дека нацијата е на крстопат, со влада која сака да „освои, анектира и изврши етничко чистење“.
