Фудбалерите на Португалија ја совладаа Хрватска со 2:1 во драматичен натпревар од шеснаесетфиналето на Светското првенство.

Португалците во Торонто направија голем пресврт, а херој беше Гонсало Рамош, кој во четвртата минута од судиското продолжение погоди за победа.

Гледавме две сосема различни полувремиња. Првото беше без многу возбудувања, а второто донесе вистинска фудбалска лудница, со голови, поништени погодоци, пенал, стативи, пречки и судиско продолжение кое траеше речиси 20 минути.

Хрватска поведе со голот на Иван Перишиќ во 53. минута, Кристијано Роналдо во 68. минута од пенал ја врати Португалија во игра, а Рамош во финишот го комплетираше пресвртот. Во последниот напад Хрватите ја затресоа мрежата, но ВАР реагираше и го поништи погодокот поради офсајд.

Португалија во осминафиналето, на 6 јули, ќе игра против Шпанија во големото ибериско дерби.

Првото полувреме мина во бавно темпо. Временските услови како да го умртвија ритамот на двете репрезентации, а единствениот удар во рамките на голот во првиот дел беше виден уште во четвртата минута.

Бруно Фернандеш се обиде во два наврати, но Доминик Ливаковиќ беше сигурен.

Португалија имаше поголема контрола и повеќе ја држеше топката, но нападите главно се сведуваа на центаршутеви, без вистинска опасност пред хрватскиот гол.

Хрватите, од друга страна, беа фокусирани на цврста одбрана и контранапади. Анте Будимир имаше неколку полушанси, но без конкретен ефект.

Тимот на Златко Далиќ многу поодлучно го отвори второто полувреме. Најпрво голема шанса пропушти Матео Ковачиќ, а потоа во 53. минута Хрватска стигна до водство.

Јосип Станишиќ центрираше, топката ги прелета сите во петерецот и стигна до осамениот Иван Перишиќ, кој го совлада Диого Кошта за 1:0.

Набрзо потоа на Хрватска ѝ беше поништен гол на Игор Матановиќ поради офсајд, а на спротивната страна Рафаел Леао со вистинска „бомба“ ја погоди пречката.

Во тие моменти во Торонто сè „гореше“. Мрежата ја затресе и Кристијано Роналдо, но и неговиот погодок беше поништен поради недозволена позиција.

Селекторот на Португалија, Роберто Мартинес, реагираше со четирикратна измена, а набрзо потоа Никола Влашиќ направи голема грешка и со прекршок врз Веига предизвика пенал.

Роналдо ја презеде одговорноста и во 68. минута сигурно реализираше од белата точка, шутирајќи по средината на голот за 1:1.

Лудиот ритам продолжи и по паузата за освежување. Хрватска неколкупати сериозно се закани, Ковачиќ ја погоди стативата, а потоа уште еднаш Диого Кошта одлично интервенираше. Голманот на Португалија набрзо го запре и Матановиќ, кој претходно го издрибла Нуну Мендеш.

До крајот на регуларниот дел, на Хрватска ѝ беше поништен уште еден гол поради офсајд, а неколку минути подоцна Мартинес го извади од игра разочараниот Роналдо.

Сè мирисаше на продолженија, но Гонсало Рамош имаше поинаков план.

Во четвртата минута од судиското продолжение, Леао одлично центрираше, а Рамош скокна меѓу двајца дефанзивци и со глава го совлада Ливаковиќ за 2:1.

Врвот на драмата се случи во 13. минута од судиското продолжение. Хрватска постигна гол во последниот напад, но ВАР го поништи погодокот поради офсајд во кој се најде Марио Пашалиќ. Судиите дополнително проверуваа дали претходно Матановиќ ја допрел топката, по што одлуката остана – нема гол.

Хрватите долго чекаа на продолжување на играта, но по повеќе од 110 минути фудбал веќе немаа сила за уште еден удар.

Португалија преживеа голема драма, ја елиминираше Хрватска и закажа спектакуларен дуел со Шпанија во осминафиналето на Мундијалот.