Полицијата во Венеција ги истражува причините за зелената течност што се појави во градскиот Голем канал, а неофицијално се зборува дека инцидентот бил предизвикан од демонстранти за климатските промени.

Бојата први ја забележале локалните жители, објави на Твитер претседателот на регионот Венето, Лука Заја.

„Свикан е итен состанок со полицијата за да се испита потеклото на течноста“, рече тој.

Италијанската противпожарна служба соопшти дека и помага на регионалната агенција за животна средина да земе примероци за тестирање.

Ова не е прв пат Големиот канал да се зазеленува. Во 1968 година, аргентинскиот уметник Николас Гарсија Урибуру „ја обои“ водата зелена за време на 34-тото биенале во Венеција со цел „промовирање на еколошката свест“.