Поранешниот холивудски продуцент Харви Вајнстин вчера пред Судот во Лос Анџелес се изјасни за невин, за силување и сексуални напади врз пет жени, соопшти канцеларијата на државниот обвинител.
Вајнстин (69) првпат се појави на судење во Лос Анџелес, каде што е обвинет за пет случаи на сексуален напад со употреба на сила, во периодот од 2004 до 2013 година. Доколку биде осуден, тој се соочува со доживотен затвор.
Некогаш еден од најмоќните луѓе во Холивуд, е обвинет за силување на две жени во хотели во Беверли Хилс во две одделни прилики, како и за сексуални напади на уште три жени во областа на Беверли Хилс и Лос Анџелес. Повеќе од 80 жени поднесоа обвиненија против Вајнстин за сексуални напади што се случиле последниве десетлетија, но само неколку случаи завршија на суд.
Некогашниот продуцент на судењето дошол во ортопедска количка, облечен во кафена затворска униформа во која бил донесен од Њујорк во Лос Анџелес. На источниот брег на САД, тој веќе отслужува 23-годишна затворска казна за други случаи на силување и други сексуални напади.
Откако на денешното судење преку својот адвокат се изјасни за невин, судот одлучи Вајнстин да остане в затвор до следното сослушување на 29 јули, соопшти обвинителството на Лос Анџелес.
Вајнстин, инаку, е соосновач на филмското студио „Мирамакс“, коешто продуцираше бројни филмски хитови како „Вљубениот Шекспир“ и „Пеколен шунд“. Студиото банкротираше во март 2018 година.
