Ова е еден од оние проекти што се дел од оној проект кој што Владата го финансира, односно средствата коишто се реалоцирани од централниот буџет кон општините, тука во Кисела Вода ќе имаме уште неколку такви, се подговуваат и други проекти за периодот којшто следи, односно за следниот повик, најави премиерот Христијан Мицкоски кој денес присуствуваше на започнување на проектот за реконструкција на коловозот на патот кон Манастирот „Пеленица“ во Општина Кисела Вода.

-Јас сум сигурен дека со овие проекти како овој ќе додадеме вредност во квалитетот на животите на граѓаните од ова населено место, од општината Кисела Вода и од соседната општина, Студеничани. Ние продолжуваме да ги реализираме ветените проекти, ветените работи. Јас му честитам на градоначалникот, на администрацијата на општината, на пратениците, на луѓето коишто помогнаа сето ова да се реализира, бидејќи знаете треба да се подготви техничка документација, одобрение соодветно итн итн. Продолжуваме со иста динамика, продолжуваме да го испорачуваме тоа што сме го ветиле на граѓаните, бидејќи за тоа сме ја добиле и довербата и во периодот којшто следи, додаде Мицкоски.

-Денес сме сведоци на уште еден значаен чекор во насока на подобрување на квалитетот на животот на жителите од Кисела Вода, Драчево и околните населени места. Со почетокот на реконструкцијата на патната делница Пеленица-Драчево, на потегот од Јустинијан Први до границата со Општина Студеничани, ја демонстрираме заедничката посветеност на локалната и централната власт за решавање на инфраструктурните проблеми кои со децении чекаа решение. Станува збор за реконструкција и проширување на фреквентна сообраќајница со должина од 3.400 метри, со изградба на тротоар од едната страна, што досега никогаш досега го немало, односно изградба на пешачка патека за рекреирање на жителите на овој дел од градот. Тука ќе се изведува и третирање на атмосферските води со ф 1000 цевки и поставување на каналетки за одведување на водите, изјави градоначалникот Орце Ѓорѓиевски.

Оваа делница, додаде тој, која не е обновена цели 30 години, конечно ќе добие нов лик и нов квалитет, обезбедувајќи подобри услови за жителите на Кисела Вода и Студеничани, како и за сите што ја користат оваа сообраќајница за пристап до селата.

– Проектот, со вредност од околу 25 милиони денари, е реализиран благодарение на средствата добиени од Владата на Република Македонија за капитални инвестиции. Сакам да изразам искрена благодарност до Премиерот Христијан Мицкоски и до Владата за оваа значајна поддршка. Горд сум што за еден месец, Премиерот трет пат е присутен во нашата општина за почеток на голем капитален проект. Неодамна заедно го одбележавме почетокот на изградба на нова детска градинка во Кисела Вода. Потоа ја започнавме реконструкцијата на спортската сала Расадник, симбол на општината, а денес го објавуваме и почетокот на оваа витална патна делница. Ова е доказ дека во Кисела Вода се случува инфраструктурен бум, и дека ги споделуваме заедничките вредности со Владата и се обединуваме околу клучни проекти кои се во интерес на народот. Заедно, преку конструктивна соработка, создаваме подобри услови за живот, развој и напредок на сите жители. Убеден сум дека оваа реконструкција, ќе придонесе за подобрување на безбедноста, ефикасноста и функционалноста на сообраќајот, и дека ќе ги постави основите за понатамошен развој на регионот, рече градоначалникот Ѓорѓиевски.