Најмалку 120 приведени демонстранти и околу 100 повредени полицајци, од кои 15 хоспитализирани е биланост од вчерашните протести во Софија против бугарската Влада.
– Она што се случи беше долг маратон на немири. Во Софија од раните часови дојдоа секакви луѓе да ја изразат својата волја и да протестираат. За жал, многу луѓе дојдоа да шират тензии. Бевме ставени на тест за да трпиме додека околу нас паѓаа повредени полицајци. Многу бомби, многу пиротехника. Тактиката во текот на целиот ден беше насочена целосно кон поштеда на животот и здравјето на демонстрантите изложени на ризик по животот и здравјето на полицијата. Ова го изјави на вонреден брифинг во 01.00 часот заменик-директорот на Софиската дирекција за внатрешни работи Антон Златанов, јави БГНЕС.
– Само во утринските часови, повеќе од 100 полицајци беа повредени, од нив 15 примени во болница, додаде Златанов.
Тој вели дека пиротехничка материја експлодирала во полициски автомобил. Своерачно направената направа била фрлен во автомобилот откако демонстрант скршил еден од прозорците. Повеќе од 60 лица беа приведени само синоќа, а вкупно околу 120. Околу 60 се со криминално досие.
– Имаше многу бомби, импровизирани експлозивни направи, експлодозија во полициски автобус, имаше големи петарди, рече Златанов.
– При масовни безредија секогаш има жртви од обете страни. Не е нормално политичарите или припадниците на јавноста да повикуваат на нарушување на јавниот ред и мир и напад врз полицајците. Никогаш не сум видел поблага полициска тактика од оваа. Ризик беше нашите вработени да бидат повредени и многумина од нив беа повредени, коментира Антон Златанов
Тактиката на бугарската полиција утрово ја бранеше и директорот на Софиската дирекција за внатрешни работи Георги Хаџиев.
– Вчера бевме сведоци како со часови беше напаѓана полицијата со пиротехника, камења, плочки, метални цевки. Како резултат на тоа, локалните лидери одлучија дека за да се спасат животите и здравјето на нашите вработени, беше потребно дел од оваа агресивна толпа да се подели и потисне. Единствената цел беше да се обидеме да ги спасиме животите на нашите вработени и мирните демонстранти, потенцира Хаџиев.
– Нашата тактика беше пасивна и воздржана. Јас ја поддржувам одлуката донесена од раководството на теренот. Шаторските кампови, како слободна форма на протест, се покажаа како добро засолниште за чување на импровизирани експлозивни направи и некои од тврдите предмети, додаде Хаџиев. Јас категорично негирам употреба на невропаралитички гас од страна на полицијата, одговори Хаџиев на новинарско прашање по тврдењата на социјалните мрежи дека бил употребен таков гас
Тој појасни дека откако утврдиле дека во шаторите на демонстрантите се кријат саморачно направени експлозивни направи, преземена е полициска операција за отстранување на блокадите и сега движењето е обновено, појасни тој.
фото: БГНЕС
