Американскиот претседател Доналд Трамп и висок ирански безбедносен функционер разменија закани денес, во услови на распостранети економски протести во Иран. Реториката дополнително ги ескалира тензиите меѓу САД и Иран откако САД ги бомбардираа иранските нуклеарни постројки во јуни минатата година.
Според Асошиејтед Прес, најмалку седум лица се убиени во демонстрациите во Иран поради лошата состојба на иранската економија, кои се проширија во руралните области во понеделник.
Трамп прво го предупреди Иран на својата платформа за социјални медиуми Truth Social дека ако „насилно убие мирни демонстранти“, САД ќе „им помогнат“.
Трамп напиша дека САД се подготвени да преземат акција, без дополнителни детали.
Кратко по неговата објава, Али Лариџани, поранешен претседател на иранскиот парламент, кој е секретар на Врховниот совет за национална безбедност на Иран, напиша на мрежата X дека Израел и САД ги поттикнуваат демонстрациите. Тој не даде докази за да ги поткрепи тврдењата, кои иранските функционери постојано ги изнесуваа за време на протестите што ја зафатија земјата.
„Трамп треба да знае дека американската интервенција во внатрешно прашање носи хаос во целиот регион и уништување на американските интереси“, напиша Лариџани на мрежата X, која иранската влада ја блокира. „Американскиот народ треба да знае дека Трамп ја започна оваа авантура. Тие треба да се грижат за своите војници“, напиша Лариџани.
Предупредувањето на Лариџани веројатно се однесува на широкото американско воено присуство во регионот, објавува АП.
Иран ја нападна воздухопловната база Ал Удеид во Катар во јуни откако САД нападнаа три ирански нуклеарни објекти.
