Рускиот претседател Владимир Путин денес изјави дека се надева дека мировните преговори меѓу Москва и Киев ќе продолжат и дека работните групи ќе можат да разговараат за тоа, наведувајќи дека на Русија ѝ е потребен долгорочен и траен мир во Украина.
Тој исто така рече дека ако Киев сè уште не сака да соработува со Москва, Русија може да почека.
Путин, разговарајќи со новинарите заедно со белорускиот претседател Александар Лукашенко, со кого се сретна неформално на островот Валаам во руска Карелија, рече дека главната задача во решавањето на конфликтот во Украина е да се искоренат причините за конфликтот и да се обезбеди безбедноста на Русија, објави РИА Новости.
Путин нагласи дека има смисла да се разговара за мирот во Украина во контекст на паневропската безбедност.
Рускиот претседател позитивно ги оцени резултатите од преговорите со Украина во Истанбул.
„Преговорите секогаш се неопходни и важни, особено кога станува збор за желбата за мир“, рече Путин.
Тој нагласи дека сите разочарувања во преговорите произлегуваат од претерани очекувања.
„Кога станува збор за какви било разочарувања од која било страна, сите разочарувања произлегуваат од прекумерни очекувања. Ова е добро познато општо правило“, рече Путин.
Според него, Лукашенко е најдиректно вклучен во процесот на решавање на проблемите во Украина со цел воспоставување мир.
Путин нагласи дека условите на Русија во врска со украинското прашање, кои беа објавени во летото 2024 година, остануваат непроменети.
„Да, условите (во врска со украинското прашање) сигурно остануваат исти. Ова не се услови, туку цели, јас ги формулирав целите на Русија. До тој момент ни беше кажано дека не е јасно што сака Русија, па ги формулиравме во јуни минатата година на состанок со раководството на Министерството за надворешни работи на Руската Федерација“, рече Путин.
Според него, потребни се длабински дискусии за мирно решавање на прашањата.
„За да се пристапи кон прашањето мирно, треба да имаме детални разговори. И не јавно, туку да го направиме тоа во рамките на преговарачкиот процес“, рече Путин.
Тој рече дека првиот сериски балистички ракетен комплекс „Орешник“ е испорачан на руската армија.
Путин, исто така, истакна дека руските вооружени сили напредуваат по целата фронтова линија во Украина и повтори дека сегашната влада во Украина не се темели на Уставот.
