Рускиот претседател Владимир Путин и папата Лав XIV денес го одржаа својот прв телефонски разговор, при што Путин изрази надеж дека Ватикан поактивно ќе ја промовира верската слобода во Украина, соопшти Кремљ.
Во соопштението се вели дека Путин и папата Лав се согласиле дека Русија и Ватикан ќе ги зајакнат врските засновани на духовни вредности и ќе ја продлабочат соработката во заштитата на христијаните, особено на Блискиот Исток.
„Двете страни го забележаа големиот личен придонес на папата Франциск во зајакнувањето на односите меѓу Русија и Светата столица. Беше договорено да се продолжат напорите насочени кон понатамошен развој на овие врски врз основа на обединување на духовните и моралните вредности, во интерес на градење на поправеден светски поредок“, соопшти Кремљ.
Додаде дека Путин и папата Лав, исто така, изразиле желба за продлабочување на соработката во културната и хуманитарната сфера, како и во заштитата на христијаните и христијанските свети места во различни региони на светот, особено на Блискиот Исток, објави ТАСС.
Папата Лав XIV во неколку наврати понуди Ватикан да биде домаќин на разговори меѓу Украина и Русија, што Москва го одби.
