САД, Велика Британија и Германија денеска ги повикаа своите граѓани да го напуштат Либан поради тензиите со Израел на југот на земјата.
Вчера Саудиска Арабија ги повика своите граѓани веднаш да го напуштат Либан, а претходно истото го направи и Кувајт.
Од почетокот на војната меѓу Израел и Хамас, која избувна по невиден напад на палестинското исламистичко движење на израелска територија, на границата се водат судири меѓу моќното либанско движење Хезболах, сојузник на Хамас, и Израел речиси секој ден.
Во денешното соопштение, американската амбасада во Бејрут ги повика американските граѓани во Либан да го планираат своето заминување што е можно поскоро, додека се достапни комерцијални летови. „Препорачуваме американските граѓани кои ќе одлучат да останат да подготват план за вонредна состојба“, се вели без да се наведат дополнителни детали.
„Ако моментално сте во Либан, ве повикуваме веднаш да заминете додека се достапни комерцијални летови“, соопшти британската амбасада.
Во текот на вечерта и германското Министерство за надворешни работи ги повика своите граѓани да го напуштат Либан со постоечките комерцијални летови.
„Во пограничната зона се случија повторени воени судири“, се додава во соопштението на Берлин, оценувајќи дека „тие може да се интензивираат во секое време“.
Денеска, Хезболах и палестинските фракции со седиште во Либан повторно разменија оган со израелската војска, при што военото крило на Хамас извести дека истрелале салва од 30 ракети кон северен Израел од југот на земјата.
Хезболах рече дека цели на неколку израелски позиции, вклучително и со „водени ракети“. Израелската војска соопшти дека возвратила на нападите.
И Франција и Австралија и другите западни земји ги предупредија своите граѓани да не патуваат во Либан. Во судирите на израелско-либанската граница од 7 октомври, според податоците на АФП, загинале дваесет лица на либанска страна, меѓу кои 13 борци на Хезболах, како и новинар на Ројтерс и двајца цивили. Најмалку три лица загинаа на израелска страна.
Борците на Хамас убиле повеќе од 1.400 луѓе на израелска територија од 7 октомври, главно цивили кои биле покосени со куршуми, живи запалени или умреле по тортурата на првиот ден од нападот на палестинското исламистичко движење од Газа, соопштија израелските власти.
Израелската армија објави дека околу 1.500 борци на Хамас биле убиени во контраофанзивата во која Израел воспоставил контрола над нападнатата област.
Во Појасот Газа повеќе од 3.700 Палестинци, повеќето цивили, загинаа во континуираното бомбардирање на израелската армија, што беше одговор на нападот на Хамас, се вели во најновиот извештај на локалните власти.
