Универзитетот Принстон во САД објави план за отстранување на името на поранешниот американски претседател Вудро Вилсон од името на својот факултет за јавна политика, поради неговите сегрегациски ставови, и со тоа ја смени одлуката донесена пред четири години.
Во писмо испратено до тој факултет, претседателот на Принстон, Кристофер Ајсгрубер, наведува дека одборот на директори заклучил дека „расистичките погледи и политики го прават Вудро Вилсон несоодветен за тој оддел да продолжи да го носи името“.
Ајсгрубер изјави дека управниот одбор одлучил во април 2016 година да направи некои измени за да го направи универзитетот „поинклузивен и искрен за својата историја“, но и да го задржи името на Вилсон. Тие се вратија на тоа прашање во светло на настаните што уследија по полициското убиство на Џорџ Флојд и други Афроамериканци.
Вудро Вилсон беше гувернер на државата Њу Џерси од 1911 до 1913 година, а потоа претседател на САД од 1913 до 1921 година. Тој ја поддржа сегрегацијата и ја воведе во неколку сојузни служби кои дотогаш не биле расно поделени. Тој исто така го забрани запишувањето на црни студенти во Принстон додека беше претседател на универзитетот.
