Аукциската куќа Кристи нуди стотици парчиња накит на австриската милијардерка Хајди Хортен на аукција во мај, но неколку организации бараат аукцијата да се откаже поради врските на нејзиниот сопруг со нацистите.
Центарот Симон Визентал, кој е специјализиран за следење на поранешни нацисти, се противи на продажбата, иако се претпоставува дека парите ќе се користат за добротворни цели. Имено, Хелмут Хортен се збогатил во Германија во времето на Нацистичката партија, чиј член бил одредено време.
Централниот дел на колекцијата се состои од 700 парчиња накит што ги поседувала вдовицата на Хортен (1941-2022). Највреден е прстенот Картие со рубин од 25,59 карати, чија вредност се проценува на 15 до 20 милиони долари, откри денеска за АФП директорот на меѓународниот оддел за накит во Кристи, Рахул Кадакија.
„Едно од попривлечните парчиња накит е таканаречената Бриолет од Индија, безбоен дијамант од 90,36 карати пронајден во Индија, кој се проценува дека вреди меѓу 10 и 15 милиони долари.“, рече Кадакија.
Други впечатливи предмети вклучуваат ѓердан од 11,15 каратни розови дијаманти со затворач со три реда природни бисери (проценети на 7-10 милиони долари). Вториот, малку поевтин ѓердан (проценет на 500.000 – 700.000 долари) е изработен од злато и дијаманти и има смарагден приврзок од 362,45 карати.
Кадакиа вели дека вредноста на оваа исклучителна колекција се проценува меѓу 150 и 200 милиони долари и додава дека Кристи последен пат одржала аукција на ова ниво во 2011 година, кога на аукција била понудена колекцијата накит на Елизабет Тејлор. За два дена биле понудени 400 парчиња накит, кои тогаш биле продадени за околу 145 милиони долари.
Овој пат, продажбата на накит од наследството на Хајди Хортен се одвива етапно за да не се нудат премногу од парчињата накит на пазарот истовремено. Од 3 мај до 15 мај онлајн ќе бидат понудени 300 артикли, на 10 мај во изложбените сали ќе бидат поделени нешто помалку од сто, на 12 мај околу 150, а уште 300 ќе бидат понудени онлајн во ноември.
Според Форбс, богатството на Хајди Хортен, која починала во јуни 2022 година, изнесувало 2,9 милијарди долари. Но, потеклото на богатството на нејзиниот сопруг, сопственик на еден од најголемите германски синџири на стоковни куќи, е спорно.
Во 1936 година, три години откако Адолф Хитлер стана германски канцелар, тој ја презел текстилната компанија Алсберг откако нејзините еврејски сопственици избегале од нацистите. Познато е и дека пред војната презел неколку продавници во сопственост на Евреи.
Затоа, Центарот Симон Визентал и Американскиот еврејски комитет го повикаа Кристи да ја прекине продажбата. „Не ги наградувајте оние чии семејства се збогатија благодарение на очајните Евреи и нацистичките закани“, се вели во соопштението за печатот на рабинот Абрахам Купер, еден од водачите на Центарот Симон Визентал.
Но, Кристи одговори дека се согласиле да ја организираат аукцијата бидејќи „сите приходи од продажбата одат во добротворни цели, а Кристи гарантира дополнителна донација во корист на истражувањето и образованието за холокаустот“, објасни Кадакија.
Американскиот еврејски комитет смета дека тоа не е доволно и дека продажбата мора да биде прекината „додека не се направат сериозни напори да се утврди колку од ова богатство доаѓа од нацистичките жртви“, со крајна цел да им се врати на преживеаните и на образовните институции.
