Со комеморативен собир и помен на влезот од гостиварската населба Циглана, беа одбележани дваесет и една година од загинувањето на полициските резервисти, Александар Николиќ и Даил Јанкоски.
Претставници на ОВР Гостивар, Македонскиот полициски синдикат, здружението на бранители, локалните ограноци на политичките партии СДСМ и ВМРО ДПМНЕ, роднини и пријатели на загинатите во спомен и слава на загинатите, на местото на погибијата положија цвеќе и запалија свеќи и оддадоа почит. Свештеници од архиерејско намесништво одржаа опело за покој на душите, а присутните запалија свеќи и со минута молчење им оддадоа почит на загинатите.
Гостиварците Николиќ и Јанкоски, ги загубија животите додека беа должност на полициски пункт ноќта на 26 август во 2002 година. Според наводите од истрагата беше утврдено дека кон нив пукале непознати лица со автоматско оружје од автомобил што се движел. Во настанот еден уште еден резервист беше ранет и го преживеа нападот.
По иницијатива на здруженијата на бранителите и полицискиот синдикат пред десететина години непосредно до местото на трагичниот настан е поставена спомен-плоча.
