За „нов почеток“ со цел „политичка промена“, како што се централните слогани, од денеска до недела грчката опозициска партија СИРИЗА ќе го одржи третиот конгрес, на кој поканет да присуствува е и поранешниот премиер Зоран Заев, јави дописничката на МИА од Атина.
Партискиот конгрес ќе започне попладнево во Атина, со говор на лидерот на СИРИЗА Алексис Ципрас, а во следните денови ќе биде и учеството на поранешниот македонски премиер.
Во рамките на конгресот ќе се одржат и различни тематски дискусии посветени на пандемијата, војната во Украина, економијата, енергетиката, климатската криза итн.
Бившите премиери Заев и Ципрас, во минатите години, имаа чести средби од кои јавноста добиваше селфиња од нивните дружења, пред и по потпишувањето на договорот од Нивици со кој на Македонија и беше сменето уставното име.
