Обединетите нации немаат никакви независни информации за уништувањето на украинската брана, изјави генералниот секретар на Обединетите Нации, Антонио Гутереш, опишувајќи го настанот како „уште една катастрофална последица од руската инвазија на Украина“.
„Нападите врз цивилите и критичната цивилна инфраструктура мора да престанат. Мораме да дејствуваме за да обезбедиме одговорност и почитување на меѓународното хуманитарно право“, им рече Гутереш на новинарите.
Водата ја проби огромната брана на реката Днепар која ги дели руските и украинските сили во јужна Украина и поплави дел од воената зона, принудувајќи ги жителите да избегаат.
И Украина и Русија побараа од Советот за безбедност на ОН да одржи дискусија за уништување на браната. Украина ја обвини Русија за „еколошки и технолошки чин на тероризам“, додека Русија го опиша настанот како „саботажа извршена од Украина“.
Гутереш го опиша уништувањето на браната како монументална хуманитарна, економска и еколошка катастрофа.
„Најмалку 16.000 луѓе веќе ги загубија своите домови и резервите на безбедна и чиста вода за пиење за илјадници други се загрозени“, рече Гутереш, додавајќи дека ОН координираат со Украина за испраќање помош, вклучително и вода за пиење и таблети за прочистување на водата.
