Генералниот секретар на Алијанса за Албанците Арбер Таравари вечерва за ТВ 24 Вести изјави дека за нив се отворени сите опции кога е во прашање формирање Влада, но главен услов е ДУИ да не биде дел од парламенатрното мнозинство, повторувајќи го ставот на партиското раководство дека по 18 години треба да се случи промена кај албанскиот политички блок.
Тој информираше дека заедно со Алтернатива идниот понеделник ќе одржат протестен марш со пораката „Доста е“, со цел да го изразат револтот против злоупотреба на гласовите и полнење на кутиите на изборите.
Како што најави Таравари, протестот ќе почне од скопски Чаир, а предвидено е да заврши пред канцеларијата на ЕУ во Скопје и пред Државната изборна комисија.
-Пораката од маршот е – доста е со полнење кутии, оставете го народот да ја изрази својата политичка волја, рече Таравари, додавајќи оти располагаат со имиња и презимиња дека гласале починати, а за тоа била информирана и Мисијата на ОБСЕ/ОДИХР.
Таравари рече дека е извршена брутална кражба на гласови во албанскиот блок, а жалбите до Управен суд им се однесуваат на Петтата и Шестата изборна единица. Тој исто така не очекува дека ќе им бидат прифатени жалбите од Управниот суд.
