Фатмата си оди дома. Со оваа кратка порака и со фотографија на која се гледа како нејзиниот партнер Абу Бакар се простува допирајќи го ковчегот во кој е телото на загинатата мигрантка од Сиера Леоне, организацијата Second tree објави дека заврши тримесечната сага која почна со насилна смрт на 23-годишната девојка при обид преку мигрантската рута и Македонија да стигне до западна Европа, објавува Телма.

-Нејзиното тело денеска ја напушти Северна Македонија. Таа наскоро ќе биде во Сиера Леоне со семејството, по нејзиното последно патување, објави организацијата која повика до сите оние кои што сакаат да споделат порака за утеха и сочувство до семејството во Африка, до Маријату и Бинтија, нејзините мајка и сестра, тоа да го направат преку интернет или со елкетронска пошта.

Така според Second tree, сите тие со сочувството ќе им покажат на најблиските на застреланата Фатмата дека „не се сите луѓе во Европа како полицаецот што пукал во неа, дека има многу што се грижат за неа.“

Абу Бакар нема да биде на погребот. Тој решил да остане во Скопје за да се бори за вистината и правдата за сопругата, на која и кажа последно збогум во Бутел, „откако помина низ емотивна и бирократска голгота.“

Враќањето на телото на Фатмата по нејзината смрт беше неверојатно тежок, долг и скап процес, велат од Second tree.

-Видовме секакви работи, од едноставна бирократска неефикасност до отворена корупција. „Ќе беше сосема невозможно да го сторам тоа сам“, рече Абу Бакар, мислејќи на многуте тела што лежат наоколу во замрзнувачи или необележани гробници низ Европа, потенцираат од организацијата Second tree.

Фатмата беше застрелана во граничен инцидент на 19-ти април. При расправија и туркање на полицаец и криумчар на мигранти, пиштолот истрелал куршум со кој била убиена 23-годишната девојка од Сиера Леоне.

Оттогаш трае истрагата, а главен осомничен е полицаецот, иако МВР првично соопшти дека криумчарот бил тој што стрелал. Обвинителството сметаше поинаку и побара да му биде одземен пасошот на полицаецот кој е првоосмничен, но истрагата се уште не е завршена и не е утврдена одговорност за смртта на Фатмата.