Американскиот претседател Доналд Трамп денес изјави дека Соединетите Американски Држави се „веројатно на два дена“ од испраќање писмо до Европската Унија за воведување нови царини за увоз во САД, додавајќи дека одложувањето се случува затоа што ЕУ сега „се однесува многу убаво“ кон САД.
„Европската Унија разговараше со нас, со Урсула (фон дер Лајен) и со целата група, и тие беа многу љубезни“, рече Трамп.
Тој повтори дека ЕУ се однесувала кон САД „многу лошо и во многу погледи полошо од Кина“ до неодамна.
„Европската Унија сега е многу љубезна кон нас и ќе видиме што ќе се случи“, рече Трамп.
Тој претходно во текот на денот изјави дека царините ќе стапат на сила на 1 август и дека нема да има понатамошни продолжувања.
Трамп рече дека некои од земјите насочени кон царините биле известени со писмо во понеделник, додека други ќе добијат формално известување подоцна во текот на денот.
Трамп известил најмалку 14 земји за новите царински стапки што ќе стапат на сила на 1 август, истакнувајќи дека таквата царинска политика би можела да се промени со трговски договор.
