Министерот за локална самоуправа Горан Милевски, министерката за образование и наука Мила Царовска и министерката за одбрана Радмила Шекеринска, денеска ќе извршат увид на проектот „Изградба на инфраструктура за социјална инклузија и едукација на деца од рурални подрачја во Пелагонискиот регион“ – реконструкција на Основно училиште „Пецо Даскалот“ во село Заполжани, Општина Долнени.
Од Министерството за локална самоуправа соопштија дека, на настанот освен министрите ќе присуствува и Џемил Ќамили, градоначалник на Општина Долнени, Гого Видимче, раководителот на Центарот за развој на Пелагониски плански регион и Славе Здравкоски, директор на основно училиште „Пеце Даскалот“.
Имено, ОУ „Пецо Даскалот“ се реновира после 60 години. За проектот, што го спроведува Министерството за локална самоуправа, од страна на Швајцарската агенција за развој и соработка, во прва фаза се издвоени над пет милиони денари, а во втора фаза над еден милион денари.
Од следната година учениците во ОУ„Пецо Даскалот“ ќе следат настава во целосно реновирани простории, со саниран кров, нов водовод и канализација, пристапни патеки, како и нови училишни клупи.
Од Министерството истакнаа дека, преку ваквите проекти Владата се обидува да ја намали миграцијата од село во град.
