Чешката полиција поведе истрага против жител на југот на земјата, кој на интернет продавал нацистички божикни украси – стаклени лампиони со ликот на Хитлер, знакот СС или со кукасти крстови. Комплетот чинел 600 евра.
„Украсите се од стакло. Се работи за неоштетени 12 предмети. Ги продавам за колекционерски цели. Ништо не пропагирам”, напишал Чехот во огласот.
Кога за рекламата се заинтересирала и полицијата, момчето објаснило дека тоа, наводно, го наследил од неговиот дедо, не знае каде и како тој ги набавил топките и оти ги продава зашто итно му требаат пари.
Од тој регион во јужна Чешка, често се појавуваат огласи за предмети со нацистички мотиви, како и во делови на Литванија, а до неодамна и во Германија.
Пред извесно време, германскиот амбасадор во Прага, Криштоф Исранг изрази незадоволство и шокираност откако во сувенирница во Прага наишол на гумена маска со ликот на Хитлер.
– Чесите толку многу страдаа во нацистичкиот режим… Зошто сега продаваат такво ѓубре?, напиша амбасадорот на Твитер.
