Опозицијата во Србија вечерва повикува на нов протест поради нерегуларностите на изборите одржани во неделата на кои партијата на претседателот Александар Вучиќ уште еднаш оствари убедлива победа.
Мирослав Алексиќ, носителот на изборната листа Србија против насилството, втор по гласови добиени во неделата, ги повика „опозициските партии, граѓанското општество и граѓаните воопшто“ да се приклучат на протестите со кои се бара поништување на изборните резултати.
Во неделата Србија гласаше на парламентарни и локални избори во десетина градови, вклучувајќи го и Белград.
На национално ниво, според официјалните резултати, Српската напредна партија на Вучиќ има 46,7 отсто, а Србија против насилство 23,5 отсто. Во главниот град предничи СНС со 44,5 отсто од гласовите наспроти СПН со 38,18 отсто.
Опозицијата ги обвинува властите за изборен фалсификат, вклучително и вметнување гласачки ливчиња и гласање на оние кои не живеат во Белград, а кои пристигнале во градот со автобуси на денот на гласањето. Неколку илјади демонстранти се собраа вчера вечер пред Изборната комисија (РИК) за да побараат поништување на резултатите од локалните избори.
Наводите за изборни нерегуларности во прелиминарниот извештај ги потврдуваат и ОБСЕ, Европскиот парламент и Советот на Европа кои зборуваат за „купување гласови“ и „полнење кутии“.
Раководството на СПН ги обвинува и државните медиуми дека не ја пренесуваат информацијата за протестите.
Маринка Тепиќ, која како и Алексиќ започна штрајк со глад, тврди дека две третини од српските граѓани воопшто не знаат што се случува.
Според истражувањето на Канцеларијата за социјални истражувања (БИРОДИ), настапите на Александар Вучиќ за време на предизборната кампања заземале околу 40 отсто од времето на вестите на националните канали.
