Градоначалникот на Тетово, Билал Касами, кој беше организатор на пречекот на косовскиот премиер Албин Курти, не се извини за веењето на знамето со т.н. „голема Албанија“ туку сподели и ново видео каде се гледа чинот, објави Макфакс.
Во видеото од 4 минути, 3 пати се покажува знамето со територијални претензии кон други држави, меѓу кои е Македонија.
Касами, над чија глава такаречи се мафташе знамето на „голема Албанија“, молчи и неодговара на прашањата од Макфакс зошто дозволил истакнување на ваква иконографијата.
Од спотот на Касами се гледа атмосферата од завчерашниот настан, со многу албански знамиња и ниту едно македонско, а се прикажува и колкава масовност имало.
МВР, како што објави вчера, трага по лицето кое го веело знамето. Но, се уште нема информации дали полицијата, која била и на настанот, го открила лицето со знамето на кое делови од териториите на Македонија, Црна Гора, Србија и Грција се преставени како дел од т.н. „голема Албанија“.
