Скопјанецот Кире Радевски, кој одлучил смогот во Скопје да го замени со чист воздух во кичевското село Белица, каде што живее, деновиве беше многу среќен откако по четири дена талкање низ шумата, неговото милениче, срнчето Бамби само се врати во неговиот дом.
– Денеска е посебен среќен ден за фамилијата, која е позната по тоа што го чува срнчето Бамби. Посебен е затоа што во неделата во 14,15 часот, срнчето Бамби било пуштено надвор во дворот, во бавчата и две кучиња го нападнале. Тоа уплашено побегнало в шума. Кога газдата Кире слушнал веднаш тргнал по него да го бара, пишуваат на Фејсбук страницата Белица.
Газдата Кире, кој е љубител на природата и животните, залудно го барал и го довикувал низ шумата.
– Цело попладне ни трага ни глас од срнчето. Така продолжил и во наредните четири дена да го бара низ планинското подрачје. Тажен, изгубил секаква надеж дека Бамби ќе се врати. Но, денеска сабајле во 8,30 часот срнчето повторно си ги гушна своите газди кои го сакаат и го хранат како свое дете. Среќни сме сите што знаевме што се случи со Бамби. Не знаевме дали повторно некогаш ќе се врати. Затоа ги молиме сите луѓе што не следат и што имаат познавања за животните, да помогнат дали има можност да се стави некаков чип и ознака за срнчето за да може да се следи и лоцира кога би се случила ваква или слична ситуација, порачаа на Фејсбук страницата Белица.
Кире, кој неизмерно го сака и го негува како дете, срнчето Бамби го пронашол и го спасил од сигурна смрт уште како малечко.
