Американскиот специјален пратеник за Блискиот Исток Стив Виткоф го опиша неодамнешниот телефонски разговор на американскиот претседател Доналд Трамп со турскиот претседател Реџеп Таип Ердоган како „брилијантен“ и „трансформативен“, но главно игнориран од медиумите.
Виткоф, гостин во онлајн програмата на американскиот новинар Такер Карлсон, ги искажа своите ставови за глобалните прашања, сугерирајќи дека разговорот меѓу Трамп и Ердоган може да донесе значителен дипломатски напредок.
„Мислам дека претседателот (Трамп) имаше одличен разговор со Ердоган пред неколку дена. Навистина трансформациски, така би го опишал“, рече Виткоф. Според него, ова е недоволно пријавено поради она што се случи со Израел и она што се случува со Русија и Украина, пренесе Anadolu.
Ердоган разговараше со Трамп минатата недела, изразувајќи уверување дека Турција и Соединетите држави ќе ја зајакнат билатералната соработка со цврст пристап воден од резултати во новата ера на односи.
Во разговорот, како што соопшти Дирекцијата за комуникации на Турција, биле опфатени билатералните односи, како и регионални и глобални прашања. Двајцата лидери последен пат разговараа во ноември, кога Ердоган му честиташе на Трамп за неговиот реизбор за претседател.
Тој го пофали американскиот амбасадор во Турција Том Барак за неговата улога во зајакнувањето на односите меѓу Вашингтон и Анкара. „Мислам дека Том Барак, кој е амбасадор таму, направи и ќе направи исклучителна работа“, рече тој, додавајќи дека верува оти Трамп има добри односи со Ердоган и дека од тоа ќе произлезат добри работи.
Виткоф рече и дека „како резултат на тој разговор има многу добри и позитивни вести од Турција“.
Тој не даде детали за конкретните теми за кои разговарале претседателите, ниту Трамп јавно го коментираше разговорот, но сепак посочи дека наскоро би можел да дојде до понатамошен развој.
„Мислам дека ќе го видите тоа во извештаите во наредните денови“, рече Виткоф, пренесе Танјуг.
