Се надевам дека телефонскиот разговор меѓу американскиот претседател Доналд Трамп и рускиот лидер Владимир Путин ќе биде успешен и ќе „го отстрани застојот“ во преговорите за Украина, изјави специјалниот претставник на американскиот лидер, Стивен Виткоф.
„Неговата интуиција (на Трамп) му „кажува“ дека треба да разговара по телефон со претседателот Путин, а тоа ќе отстрани одредени пречки и ќе нè однесе таму каде што се упатуваме. Мислам дека тоа ќе биде многу успешен повик“, изјави Виткоф за телевизијата АБЦ.
Виткоф оцени дека САД успеале донекаде да ги намалат разликите во ставовите на Русија и Украина и да ги зближат. Трамп претходно објави на социјалната мрежа „Истина“ дека има намера да разговара телефонски со рускиот лидер во понеделник, 19 мај.
Во меѓувреме, Кремљ потврди дека се во тек подготовки за телефонски разговор меѓу двајцата претседатели.
Во петокот во Истанбул се одржаа директни преговори меѓу Русија и Украина, за време на кои беше договорено размена на затвореници, како и двете страни да ги презентираат своите ставови за потребните услови за прекин на огнот.
Ова беше дискутирано во текот на денот, на иницијатива на Вашингтон, од страна на Рубио и рускиот министер за надворешни работи Сергеј Лавров.
