Албанската влада во врска со информациите на медиумите дека во Албанија ќе се формира Центар за повратници на припадници на терористичката ИД од балканските земји, реагираше доцна попладнево, нагласувајќи дека не постои никакво барање или план за такво нешто.
– Тоа се лажни вести, со провокативен и политички карактер, отворени шпекулации дека наводно во Албанија ќе биде отворен Центар за балкански повратници од ИД. До сега не постои никаква идеја, барање, план или можност за такво нешто, изјави Сандер Леши, советник за безбедност на премиерот Еди Рама.
Според него злоупотребена е една фраза од изјавата на бугарскиот премиер Бојко Борисов „која нема никаква врска со она што тој го изјави“.
– Напротив станува збор за Центарот за координација против насилниот екстремизам, што беше и организатор на меѓунанродната конференција што деновиве се одржа во Тирана а на која учествуваше и премиерот Борисов. Албанија предложи овој центар да прерасне во регионален, каде ќе бидат обработувани анализи, оценки, истражувања, студии, размена на информации,како и заеднички програми против насилниот екстремизам,- тврди Леши.
Тој посочува дека овој центар не е, не може да биде а и никој ни не помислил да се претвори во центар за прифаќање на поранешни борци на ИД од балканските земји.
Ова е прва реакција на владата околу ова прашање, кое предизвика лавина реакции во Албанија и е топ тема во медиумите изминатите три дена. Остри реакции имаше и од Демократската партија, Движењето за социјалистичка интеграција и Републиканската партија, кои му порачаа на премиерот Рама дека Албанија не е негова сопственост и оти за отворање ваков центар треба да одлучи Парламентот во кој е претставен целиот народ а не премиерот кој е само администратор на извршната власт.
