Украински капетан на брод за крстарење е осуден денеска во Унгарија на пет и пол години затвор за неговата улога во несреќата во 2019 година во која неговиот брод удри и потопи помал брод на Дунав.
Украински капетан на брод за крстарење е осуден денеска во Унгарија на пет и пол години затвор за неговата улога во несреќата во 2019 година во која неговиот брод удри и потопи помал брод на Дунав, при што загинаа 25 јужнокорејски туристи и двајца членови на екипажот.
Во најголемата катастрофа на Дунав во повеќе од половина век, помалиот туристички брод „Сирена“ потона со 35 луѓе, откако беше погоден од брод за крстарење под мостот во Будимпешта при силен дожд. Дваесет и пет од загинатите биле Јужнокорејци. Загинаа и капетанот на „Сирена“ и член на неговиот екипаж, а еден Кореец се уште се води како исчезнат.
„Обвинетиот Ц. Јуриј беше прогласен за виновен за небрежност што претставува закана за транспортот на вода и судот го осудува на пет и пол години затвор“, рече судијката Леона Немет, изрекувајќи ја жалбената казна. Украинецот, кој е во притвор од 2019 година, пред судот изјави дека му е „длабоко жал“ за трагедијата.
„Не можам да побегнам од сеќавањето на оваа страшна трагедија ниту за минута, не можам да спијам и мислам дека тоа е она со што треба да живеам до крајот на мојот живот“, изјави видно потресениот маж на судот. Капетанот беше ослободен од судот од обвинението дека не пружил помош. Само седум корејски патници ја преживеаја несреќата.
