Српскиот претседател најави продолжување на телефонските консултации со претставниците на САД и ЕУ во обид да се избегнат тензиите и насилството на Косово.

Во исто време, косовскиот премиер испраќа пораки дека е подготвен да му „подаде рака“ на Вучиќ доколку Србија се согласи да се откаже од гранични контроли во иднина.

Вашингтон и Брисел заеднички се обидуваат да спречат нови тензии меѓу Белград и Приштина пред 1 септември, за кога косовската влада го одложи спроведувањето на реципрочната одлука за личните документи и регистарските таблички, но во тридневните разговори со лидерите на двете страни оваа недела не е направен чекор поблиску до договор и решение.

Александар Вучиќ оцени дека е само прашање на време кога ќе дојде до поголема криза и рече дека нема да има напредок во понатамошниот дијалог доколку Косово не почне да ја исполнува обврската од Бриселскиот договор од 2013 година за формирање Заедница на српски општини. .

„Дали ќе биде 1 или 10 септември… Од 1 септември почнуваат да го менуваат (регистрациските) таблички, а рокот им е два месеци… можете да замислите какви тензии ќе има во тие два месеци“, изјави Вучиќ пред новинарите во Осечина, во западна Србија, каде денеска го отвори Саемот на сливи.

Вучиќ не верува дека ќе има напредок со Приштина во однос на проблемот со регистарските таблички, но се надева на решение на проблемот со документите.

Косовската влада најави дека по едномесечно одложување под притисок на САД од 1 септември ќе почне да ја спроведува одлуката за пререгистрација на косовските возила со српски регистарски таблички и издавање документ за влез-излез на српските државјани, како реципрочна мерка која Србија ја применува за граѓаните на Косово.

Американскиот пратеник Габриел Ескобар денеска изјави, по разговорите во Приштина со косовските Срби во средата и со Вучиќ во Белград доцна синоќа, дека САД ја слушнале загриженоста на граѓаните на Србија.

„Во многу случаи постои сериозна загриженост за Србите во Косово, има сериозен проблем во довербата“, рече Ескобар, изразувајќи надеж дека сепак ќе се постигне договор за регистарските таблички и документите.

Косовскиот премиер Албин Курти во интервју за германскиот весник „Ди Велт“ изјави дека немирите што избувнаа на 31 јули поради новите мерки „не беа предизвикани од српското малцинство од северот на Косово, туку од организираниот криминал и олигарсите кои се на платниот список на Србија и кои добиваат инструкции што треба да спроведат на Косово“, објави агенцијата Бета.

Курти, исто така, рече дека новите правила за реципроцитет на Косово нема да стапат на сила на 1 септември доколку Србија се откаже од граничните контроли.

„Подготвен сум да му подадам рака на Вучиќ. Доколку Србија се согласи да се откаже од граничните контроли во иднина, тогаш ќе го сториме истото. А потоа од 1 септември нема да има нови правила“, изјавил Курти за Die Welt.