За Илиевски ЗНМ и ССНМ се „ценети еснафски здруженија“, но ќе ги тужи за клевета и ќе бара 1984 евра отштета

1984 евра. Барање со симболична сума за отштета како насловот на познатиот дистописки роман на Џорџ Орвел во кој слободата на мислата и слободата на говорот се забранети, објавива ТВ АЛФА. Телевизискиот водител и новинар Богдан Илиевски ќе ги тужи ЗНМ и ССНМ за клевета откако тие го обвинија за наводно поттикнување говор на омраза. Сакаат да воведат цензура и полиција на мислите, како во романот 1984-та, вели Илиевски.

„Размислував да побарам симболична отштета од 1984 евра, како симболика на орвеловата 1984, кои што потоа, ако ги добијам, ќе ги донирам, нема да задржам ниту денар од тие пари. Мене ми е важно само да ја докажам својата поента, да ја бранам слободата на говор која ја имаме. Особено како новинар вработен во Алфа, дека имам право да поставувам прашање. Особено такво, бенигно прашање „добро, зошто?“ кое што ценетите еснафски здруженија го протолкуваа како поттикнување на омраза“ – изјави Богдан Илиевски.

Тој на социјалните мрежи само напиша „добро, зошто“ и сподели кратко видео од интервју од друга телевизија.

Поради ова ЗНМ и ССНМ побараа обвинителството и МВР да преземат мерки за водителот на „Вечерното шоу“ на Алфа.

„ЗНМ и ССНМ упатија заедничко писмо до странските амбасади и организации во земјава со особена загриженост во контекст на интернет заканите и нападите врз новинарките. За овој случај ЗНМ поднесе официјално барање за кривично постапување при МВР“ – стои во соопштение на ЗНМ.

Богдан Илиевски вели дека ситуацијата е апсурдна, бидејќи токму еснафските здруженија бараат кривична одговорност за него.

„Без оглед како се викаат, во прицнип, треба да го бранат правото на новинарите да поставуваат прашања. А не да упатуваат јавно соопштенија во кои што ќе кажат дека новинари поттикнувале омраза, тука е и оној дел за „Оффнет“ дека имал некоја кампања против Лепа Џундева, па оние пријави до странски амбасади. Чудесни работи, најдобро ќе е сите тие да ги избистриме во една постапка пред инситуциите“ – додава Илиевски.

Илиевски најпрвин побара извинување од ЗНМ и ССНМ, но откако не го доби се одлучи тој да поднесе тужба против нив. Сега на потег се инситуциите, кои ќе треба да одлучат, дали во соопштението на ЗНМ има клевета, или пак во објавата на Илиевски поттик за говор на омраза.