Со изведување на точката „Егзерцир“ и воено-акробатска вежба, припадници од Баталјонот за почести од АРМ и од почесната чета на Вооружените сили на Република Хрватска денеска пред трговскиот центар „Бисер“ во аксопската населба Аеродром презентираа изведби на строева извежбаност во работа со пушка.
Жителите на Аеродром имаа можност покрај познатата точка на македонските и хрватските гардисти да слушнат и кратка изведба на Воениот оркестар на Армијата, кој во претходниот период имаше повеќе заеднички настапи со воени оркестри на други армии, меѓу кои последниот беше во април кога настапија со воените оркестри на уште четири армии.
Активноста се спроведува врз основа на билатералната воена соработка за изведување заедничка обука меѓу двете армии, а ова е првпат припадници на овие две гардиски единици да имаат заеднички настап.
На денешниот настап, кој беше отворен за јавноста, присуствуваа државниот секретар во Министерството за одбрана, Драган Николиќ, директорот на Генералштабот, генерал-мајор Зоран Милески, претставници од Амбасадата на Република Хрватска во Македонија, Министерството за одбрана и Генералштабот, Општина Аеродром, Град Скопје, воено-дипломатскиот кор и други.
