Два дена по одржувањето на лидерската средба работните групи на парламентарните партии се уште ги немаат отстрането несогласувањата што се појавија при примена на тоа што го договорија лидерите на средбата. Претставници на власта вчера порачаа дека нема да прифатат никакви ултиматуми и уцени од опозицијата, која пак тврди дека единствено за што се грижи се националните интереси на државата.

Координаторите на пратенички групи вчера потврдија дека бил усогласен Законот за Влада во делот на техничката влада и дека на него веќе има потписи од сите на пратенички групи, вклучувајќи ја и ВМРО-ДПМНЕ. Според извори во владејачките партии, проблем настанал кога требало да се имплементира договореното за финансирање на политичките партии и кога освен во Законот за финансирање на политичките партии, опозицијата побарала измена во членот 165 од Кривичниот законик.

Ние немаме мандат за менување на Кривичниот законик, рекоа од владејачките партии. Нагласија, исто така, дека премиерот Зоран Заев е дециден оти нема да дозволи никаква амнестија, ниту директна, ниту индиректна.

Заев, пак, на средба со државниот министер надлежен за Европа Михаел Рот истакна дека Република Македонија е многу блиску до реализацијата на стратешките цели – членството во ЕУ и НАТО, и оти нема да дозволат процесот да го нарушат или да го доведат во ризик неодговорни ултиматуми.

– Остануваме посветени до крај да стигнеме до решенија кои ќе овозможат услови за фер референдум во интерес на граѓаните на нашата земја, истакна Заев.

Од ВМРО-ДПМНЕ, во повеќе наврати, соопштија дека наводните барања за амнестија и змени на Кривичниот законик се измислица на владејачките партии за да го свртат вниманието на јавноста од актуелните тендери и делби на народни пари од буџетот на фирми и поединци од власта. Како што беше случајот со парите од Фондот за иновации, кои беа поделени на фирми блиски на вицепремиерот Кочо Анѓушев, пратеникот Хари Локвенец, фирма од снаата на советничката на премиерот Заев, Цветанка Ласкова, како и за проекти и фирми на лица од медиумите блиски до власта.

Претседателот на ВМРО-ДПМНЕ, Христијан Мицкоски, пак, на средбата со Рот истакнал дека партијата искрено се залага за интеграција на Република Македонија во ЕУ и НАТО, но истовремено нагласил и дека „еднострано обврзувачкиот договор потпишан со Република Грција е штетен на интересите на Република Македонија и дека тој не може го поддржи“.

Извори од пратеничките групи, сепак, се оптимисти дека договор ќе биде постигнат и оти до сабота би можело да се изгласа договореното на лидерската средба вклучувајќи ја и ДИК.

Во спротивно, од СДСМ и ДУИ нагласуваат дека останува отворена опцијата да го изгласаат составот на ДИК со 61 глас според преложените измени на Изборниот законик, кои се уште не се повлечени, односно без опозиција, опција која велат дека на ја посакуваат имајќи го предвид историскиот момент за Македонија.