Украинскиот претседател Володимир Зеленски изјави денеска дека на рускиот претседател Владимир Путин не му треба крај на војната.
Украинскиот претседател Володимир Зеленски изјави денеска дека на рускиот претседател Владимир Путин не му треба крај на војната бидејќи „сака да ја ескалира ситуацијата за новоизбраниот американски претседател Доналд Трамп да не може да ја заврши руската војна против Украина“.
Тој потсети дека Путин денеска во Казахстан повторно рекламирал руски ракети и „подготвеност за убивање и уништување“.
„Путин јасно сака да додаде илјадници и илјадници проектили кои веќе ја погодија Украина. Нему не му треба крај на оваа војна. Освен тоа, Путин сака да ги спречи другите да ја завршат оваа војна. Тој сега може да мавта со својот „Орешник“ само за да ги попречат напорите на претседателот Трамп, што секако ќе се случи по инаугурацијата. Путин сега сака да ја ескалира ситуацијата за Трамп да не направи ништо и да не може да стави крај на војната“, рече Зеленски во вечерашното видео обраќање, пренесува Укринформ.
Според него, Путин е единствениот виновник за оваа војна и единствениот кој верува во војна.
„И затоа сегашната ескалација на Путин е притисок подоцна да го принуди американскиот претседател да се согласи со условите на Русија“, рече Зеленски.
Тој ги повика сите Украинци да се засолнат кога има воздушни напади и ракетни закани.
“Ова е цврсто правило – правило кое не зависи од одредени изјави од Русија. Сега може да има уште повеќе руски обиди да сее страв и очај во Украина. На сите ни треба издржливост за да го надминеме сето ова. И ни треба единство – со сите партнери“, изјави претседателот на Украина.
Според него, Путин сега го прави она што секогаш го прави: заплашува, разделува, се обидува да ги скрши или потресе сите поединечно.
„Тој веќе не може ништо. Тој губи кога е сам. И сега мора да изгуби. Во сè. И ќе биде безбедно за сите“, рече Зеленски, коментирајќи ја изјавата на рускиот претседател во Организацијата на Договорот за колективна безбедност ( ОДКС) на самитот во Астана дека цели на новите балистички ракети „Орешник“ би можеле да бидат „центри за донесување одлуки во Киев“.
Зеленски најави дека утре планира да разговара со германскиот канцелар Олаф Шолц.
„Мораме заедно да реагираме на обидот на Русија да ја направи ситуацијата неподнослива и да ја продолжи оваа војна“, нагласи Зеленски.
Според него, Украина и сите нејзини партнери се заинтересирани за мир и сега е неопходно да се зајакнат позициите на Украина.
„На секоја руска уцена треба жестоко да се реагира – како што тоа го заслужува Владимир Путин. И мора да се види перспективата за завршување на војната со вистински мир заедно со Америка, заедно со Европа, заедно со сите партнери. Ни треба вистински мир – мир благодарение на силата, а не овој збир на катастрофи, кога диктаторот во Москва 25 години му наметнува услови на секој нов лидер со своите проектили“, заклучи украинскиот лидер.
