Војната доаѓа во Русија, во нејзините стратешки центри и воени бази, изјави украинскиот претседател, Володимир Зеленски, откако беспилотно летало погоди деловен кварт во Москва.
„Војната постепено доаѓа на територијата на Русија, во нејзините културни центри и воени бази и тоа е неизбежен, природен и апсолутно праведен процес“, рече Зеленски.
„Украина станува посилна“, додаде тој.
Русија во неделата наутро објави дека одбила два одделни напади со украински беспилотни летала во текот на ноќта. Целта на едната беше анектираниот полуостров Крим, а на другата Москва.
Во руската престолнина, чиј меѓународен аеродром накратко беше затворен, лесно беа оштетени две канцелариски кули во главниот деловен кварт.
Руското Министерство за одбрана соопшти дека во нападот на Москва учествувале три беспилотни летала, од кои едното било соборено, а останатите две биле „неутрализирани со електронско војување“.
