Омилениот сведок на обвинителката Вилма Русковска и судијката Добрила Кацарска, Александар Василевски Нинџа денеска излезе на слобода од затворот во Шуто Оризари. Според информациите на „Телма“ од Управата за водење санкции, Нинџа добил право на слободен викенд и до недела во 16 часот ќе биде на слобода.
Директорот на Управата Марјан Спасовски за „Телма“ вели дека како и останатите затвореници така и Василевски може да добие викенд на слобода после одлежана една третина од казната, а тој според управата веќе одлежал 3 години и 8 месеци од 7 годишната затворска казна. Вели дека Нинџа веќе би имал право да побара и условен отпуст од затворот оти таа погодност ја имаат затворениците со одлежана пола казна.
Според пресметката на „Телма“ пак Нинџа има одлежано 3 години и 3 месеци од затворската казна, бидејќи тој зад решетки влезе во јуни 2018, откако претходно половина година беше во бегство.
