Македонија ја гледам на вистинската страна на историјата, како што секогаш била и затоа уште на првиот ден од оваа неправедна војна во која една голема држава напаѓа помала, ја напаѓа нејзината демократија и нејзиното право за уредување на сопствената држава, се поставивме на страната на демократијата, порача денеска премиерот Димитар Ковачевски на заедничката прес-конференција со француската државна секретарка за Европа, Лоранс Бун.
Одговарајќи на новинарско прашање за тоа каде ја гледа земјата во третиот светски поредок, Ковачевски рече дека Македонија ја гледа како полноправна членка на Европската унија, која ќе изгради економски, политички, демократски и социјален систем, еднаков со сите други земји членки на ЕУ.
– Конечно македонските граѓани, македонската иднина и македонските деца да можат да живеат во држава членка на ЕУ, ама да живеат тука во својата држава, а не да живеат во туѓина, во некоја друга држава членка на ЕУ. Мојата визија и визијата на Владата е многу јасна. С. Македонија ќе биде членка на ЕУ со заштитен македонски јазик, заштитен идентитет и со заштитена историја и култура. Тоа е држава што почива и на борбата на борците од 1903 година и држава која што почува на Народноослободителната војна од 1941 година и држава која што почува на слободното и референдумско изјаснување на граѓаните на Македонија во 1991 година, нагласи Ковачевски.
Во однос на случувањата во Полска и понатамошни ставови на Владата, Ковачевски рече дека во моментов во Брисел се одржува состанок на земјите членки на НАТО, каде присуствува и нашиот амбасадор и целата комуникација во однос на тоа прашање ќе следува по тие состаноци и консултации кои што се прават во Брисел.
– Во однос на случувањето во Полска, вчера изразив сочувство на премиерот на Полска за тоа што се случи. Во однос на понатамошни ставови на македонската Влада и мене како премиер ќе следат по состаноците и консултациите во Брисел, изјави Ковачевски.
