Украинскиот претседател Володимир Зеленски изрази страв од губење на двопартиската поддршка од Соединетите држави, по, како што рече, „опасните пораки што доаѓаат од некои републиканци“.
„Мајк Пенс (поранешен потпретседател на САД) нè посети и ја поддржува Украина. Пред сѐ како Американец, а потоа како републиканец“, рече Зеленски на вчерашната прес-конференција во Киев. „Имаме двопартиска поддршка. Сепак, во нивните кругови кружат различни пораки за поддршката за Украина. Некои републиканци испраќаат понекогаш опасни пораки дека поддршката може да биде помала“.
Зеленски нагласи дека, без оглед на тоа кој ќе победи на следните претседателски избори во САД, одржувањето на двопартиската поддршка е „најважната работа за Украина“.
За време на истата прес-конференција, на прашањето дали се плаши за сопствениот живот, Зеленски одговори дека ја смета ситуацијата „поопасна за Путин“ поради зголемениот број меѓународни противници на рускиот претседател.
Потсетуваме дека прашањето дали САД треба да продолжат да и помагаат на Украина против руската инвазија создаде поделба во Републиканската партија.
Републиканските претседателски кандидати се поделени во два табора: изолационисти, особено поранешниот претседател Доналд Трамп и гувернерот на Флорида Рон ДеСантис, кој верува дека САД се премногу вклучени во поддршката на напорите на Украина да се брани од руската инвазија; и т.н. „јастреби“, вклучително и неколку поранешни функционери на администрацијата на Трамп, кои се залагаат за уште поагресивен став кон Русија. И двата табора предупредуваат дека може да следи светска војна доколку не се послушаат нивните ставови.
