Во продолжението на офанзивата на израелската армија врз болницата Ал Шифа во градот Газа, загинаа уште педесетина милитанти, соопшти денеска израелската армија.
„Во изминатиот ден во размена на оган беа елиминирани повеќе од 50 терористи“, соопшти армијата, додавајќи дека од почетокот на операцијата пред неколку дена во реонот на болницата биле елиминирани повеќе од 140 милитанти.
Израелските сили објавија и дека пронашле складишта за оружје. Цивилите, пациентите и лекарите не се повредени, а медицинската опрема не е оштетена, тврдат од армијата.
Информациите не можеле веднаш да бидат независно проверени.
Израелските сили упаднаа во најголемата болница во Појасот Газа во понеделникот рано наутро во напад врз Хамас и неговата инфраструктура.
Во операцијата досега се убиени двајца израелски војници, соопшти армијата. Приведени се околу 160 осомничени. Израелската војска веќе изврши рација во Ал Шифа во средината на ноември и рече дека таму пронашла тунелски комплекс на Хамас.
Војната во Газа предизвика масакр од страна на терористите на Хамас и другите екстремистички палестински групи на 7 октомври во Израел, во близина на границата со Појасот Газа.
Израел е изложен на сѐ погласни меѓународни критики поради големиот број цивилни жртви и катастрофалните услови во Појасот Газа.
