Претседателот на Владата на Република Македонија, Христијан Мицкоски во вечерашното интервју во Топ тема на телевизија Телма вели дека договорот за специјална економска соработка со Република Унгарија е договор за заем помеѓу двете влади, потенцирајќи дека Виктор Орбан даде конкретна поддршка за потребите на земјата.
„Ова е договор влада помеѓу влада за специјална економска соработка или таканаречен рамков договор врз основа на потребите наши. И тука е пријателството кое што јас го имам лично и тука се разговорите кои што ги водевме изминатиот период кога бевме во опозиција и сега дека доколку бидеме Влада и состојбата е таква каква што очекуваме дека ќе ни биде потребна поддршка. И таа поддршка ја добивме и сега ние се трудиме од внатре колку што можеме да ја отежнеме, да ја испровоцираме зошто била евтина.“, истакна тој.
Премиерот Мицкоски истакна дека за разлика од претходната влада, овој заем ќе оди транспарентно на владина седница и во Собранието, без претходно да се протне на шверцерски начин или да се лепат европски знаменца.
„И тоа ќе биде дел од закон кој што ќе помине во македонскиот парламент. Нема тоа да биде шверцерски протнато на мала врата како специјален закон, па ќе му лепиме европско знаменце. Туку многу транспарентна процедура, закон поминат на владина седница, во Парламент. Сме заштедиле 100 и кусур милиони евра и сега наместо ние да речеме алал да му, е ние велиме е од каде му се сега тие парi“, изјави премиерот Мицкоски.
На прашањето дали ќе има некои дополнителни барања од страна на Унгарија, премиерот Мицкоски рече:
„Па кога правиме договор се, се става на маса. И има ли некои барања? Еве нема.“
Премиерот Мицкоски е дециден дека со ова државата ќе заштеди над 100 милиони евра само по основ на камати.
„Ние заштедуваме 100 и кусур милиони евра само по основ на камати.“, нагласи тој.
