Гувернерот на Хаваите најави спогодба од 4 милијарди долари за побарувањата на повеќе од 2.000 луѓе кои бараат компензација за минатогодишните смртоносни шумски пожари на Мауи.
Кабинетот на гувернерот Џош Грин потврди дека е предложен начелен договор за решавање на околу 450 правни случаи.
Шумските пожари во август 2023 година беа најсмртоносните во модерната историја на САД, при што загинаа повеќе од 100 луѓе и го уништија историскиот град Лахаина.
Во извештајот што го виде Би-Би-Си, се наведува дека предложениот договор вреден 4,037 милијарди долари мора целосно да ги реши сите побарувања на оштетените поврзани со пожарите на Мауи.
Спогодбата, за која гувернерот Грин рече дека е постигната по четири месеци преговори, ќе ја платат седум субјекти именувани во тужбите поднесени по пожарот.
Тие се државата Хаваи, округот Мауи, Хавајски електрик, училиштата Камехамеха, Вест Мауи Ленд Ко, Хавајски Телком и Спектар/Чартер комуникации.
Хаваи Електрик потврди дека ќе придонесе со речиси 2 милијарди долари, нешто помалку од половина од вкупниот договор за порамнување.
Стотици правни случаи се покренати од поединци, бизниси и осигурителни компании во државните и федералните судови, рече Грин. Тој додаде дека приближно 2.200 засегнати страни поднеле тужби.
Неговата изјава јасно стави до знаење дека во моментов се уште е начелен договор и бара конечно судско и законодавно одобрение.
– Договорот е условен со намирување на побарувањата на осигурителните компании кои се веќе платени за загуба на имот и други штети, без дополнителни плаќања од страна на тужените – се додава.
Грин рече дека спогодбата „ќе им помогне на нашите луѓе да закрепнат“, додавајќи дека негов приоритет е да избегне долги и болни судски процеси за да овозможи процесот на закрепнување да започне што е можно поскоро.
– Да се реши вакво нешто во рок од една година е без преседан и ќе биде добро нашите луѓе да не чекаат да ги обноват своите животи како што тоа го правеа другите на многу места што претрпеа слични трагедии – рече тој.
Кога ќе се постигне конечно решение, тоа мора да биде одобрено и од законодавниот дом на Хаваите, рече Грин, додавајќи дека исплатите се очекува да започнат кон средината на 2025 година, пишува Би-Би-Си.
