Стари и дотраени противпожарни возила, недостиг на опрема, недоволно и слабо одржувани авиони и хеликоптери, пилоти кои се вратија од пензија за да помогнат во гаснењето… Низа проблеми го отежнуваат справувањето со пожарите кои во изминатите неколку недели зафатија над 6 проценти од територијата на Македонија.
Но, не е само опремата. Директорот на Центарот за управување со кризи Стојанче Ангелов вели дека работи со само десетина луѓе. Буџетот за 2024 година покажува дека ЦУК има 340 вработени. Во интервју за Радио Слободна Европа, Ангелов вели дека добар дел од нив се неупотребливи.
„Ние во Центарот за управување со кризи работиме на шкрги. И овде јас работам со десетина луѓе, сите операции, покривам по една област со по еден човек, не дај Боже, некој да се разболи, имам незаменливи луѓе, а добар дел од луѓето се апсолутно неупотребливи, односно по некој пат ставаме во функција некој вработен – ќе ни направи дополнителна штета и потоа треба двајца да ја поправат таа штета“, вели Ангелов.
Тој вели дека ЦУК е наполнет со партиски кадри кои партиите не можеле да ги вработат на друго место, па ги сместиле тука и ги направиле раководители, а тие што разбираат ги чувале во подрум.
„Има една група од Воена академија којашто за нивна несреќа завршила директно во ЦУК, ги најдов малтене во подрум, затоа што беа на најниските почетни позиции. Ги унапредив сите, сите до еден ги ставив во функција. И уште неколку квалитетни луѓе. Ако овде направиме анализа на раководителите, повеќе од 51 отсто имаат завршено македонски јазик или Педагошка академија. Но, се плашам дека 70 проценти од раководителите имаат македонски јазик и Педагошка академија“, вели Ангелов.
