Со резултатите на локалните избори, граѓаните потврдија дека Македонија е на вистинскиот пат, порачува градоначалникот на Гази Баба, Бобан Стефковски, во интервју за КУРИР.

Сограѓаните повторно му ја дадоа довербата тој да раководи со нивната општина. Со Стефковски разговаравме за проектите во Гази Баба, изборите, претстојниот конгрес на ВМРО-ДПМНЕ…

КУРИР: Помина еден месец од локалните избори на кои граѓаните на општина Гази Баба повторно Ви ја дадоа довербата и победивте уште во првиот круг со сериозна разлика во гласови во однос на вашиот против кандидат. Според Вас, на што се должи ваквиот резултат?

Стефковски: Со оглед на тоа дека ова е моето прво интервју за медиум по оддржувањето на локалните избори, би сакал да ја искористам и оваа прилика уште еднаш да изразам голема благодарност до граѓаните на општина Гази Баба за големата поддршка која ми ја дадоа на изборите со 10.914 гласови разлика. Тоа за мене претставува чест, но и сериозна одговорност. Во првиот мандат успеавме да започнеме голем број на капитални проекти, решивме многу проблеми на граѓаните, но имаме уште работа. Изборниот резултат беше очекуван, ако се земе предвид се она што го направивме во изминатите четири години. Покажавме на дело како се работи, граѓаните можеа да направат разлика помеѓу претходните раководства на општината и нас. Најважно од се е тоа што општината ја вративме на граѓаните. Отчетноста и транспарентноста ги издигнавме на врвот. За плановите во општината, одлучуваше граѓанинот, а не урбаната мафија. И кога ќе се направи еден сублимат од сите области каде општината има сериозен напредок, тогаш нормално е да очекувате поддршка од граѓаните на изборите и тоа се случи.

КУРИР: ВМРО-ДПМНЕ беше убедлив победник на изборите. Покрај во традиционалните општини партијата однесе победа и во Струмица и Кичево. Што покажа овој изборен резултат?

Стефковски: Одговорот на ова прашање ќе го поделам во два дела. Во првиот дел ќе се осврнам на успехот на ВМРО-ДПМНЕ, а во вториот дел на неуспехот на опозицијата.

Успехот на ВМРО-ДПМНЕ е резултат кој се должи од два фактори. Првиот е работата на Владата во изминатата година и половина време, реформите, борбата со криминалот и корупцијата, економските мерки, покачувањето на платите и пензиите, новите странски инвестиции, бројните инфраструктурни проекти. Втор фактор е работата на градоначалниците во мандатниот период 2021 – 2025 година. Мандат во кој немаше ниту еден коруптивен скандал и тоа морам да потенцирам дека во повеќе од половина од тој мандат, централната власт ја имаше СДСМ и ДУИ кои секојдневно преку инспекциски служби и инструмент на одземање на ингеренции беа кочница за развојот на општините, но и покрај тоа тие четири години јавноста беше сведок на “натпревар” помеѓу градоначалниците за тоа кој повеќе проекти ќе реализира и кој подобра мерка ќе промовира.

Резултатот во Струмица беше очекуван бидејќи граѓаните таму 20 години за сите избори слушаа само ветувања, а по изборите ветувањата се забораваа. Што се однесува на Кичево, лично сметам дека резултат најмногу се должи на мудроста во водењето на политиката од страна на премиерот Христијан Мицкоски и изневерените очекувања на граѓаните од страна на ДУИ.

По однос на неуспехот на СДСМ би кажал неколку работи.

Во СДСМ се потребни вистински и суштински реформи. Во овој момент таа партија е заложник на сенки од минатото кои мислат дека граѓаните имаат кратка меморија, односно дека не паметат кој е Венко Филипче, Заев и сличните на нив.

СДСМ се обиде да ги понижи граѓаните, а кој го направил тоа се соочил со изборен резултат како оној со кој се соочи СДСМ во Скопје да биде не втора, не трета, туку четврта партија по број на добиени гласови.
Би заклучил дека со резултатот од локалните избори, народот покажа дека Македонија е на вистинскиот пат.

КУРИР: На 6-ти декември во Кавадарци, ВМРО-ДПМНЕ ќе го оддржи својот редовен Конгрес. Дали Вие сте делегат на Конгресот и кои се Вашите оечкувања? Се зборува за кадровски промени во Владата и партијата по него.

Стефковски: Да, јас сум делегат на Конгресот на ВМРО-ДПМНЕ кој е закажан за 6 декември во Кавадарци. Тоа е редовен Конгрес кој согласно Статутот на партијата се оддржува еднаш во четири години. Мојата лична поддршка за реизбор ја има претседателот Христијан Мицкоски бидејќи тој со својата работа во изминатите години ја издигна партијата до ова ниво да биде партија со најголема поддршка од народот во Македонија. Што се однесува до промените во партијата, се прават анализи и согласно тоа ќе се носат и одлуки.

КУРИР: Да се осврнеме на неколку локални теми. Кој е Вашиот фокус во моментот во општина Гази Баба? Што да очекуваат граѓаните во периодот што следи?

Стефковски: Веднаш по завршувањето на изборите оддржав секторски колегиуми и изборната програма со која граѓаните ми ја дадоа поддршка на изборите ја направивме програма за работа на општината во следните четири години. Во овој момент интензивно работиме на подготовка на буџетот на општината за 2026 година во кој ќе има многу нови проекти и мерки кои произлегуваат од изборната програма. Не очекуваат години на силен развој и напредок во сите населени места. Ќе реализираме многу проекти.

КУРИР: На еден месец по завршување на изборната кампања, Вие започнавте со нова кампања наречена „Проектите почнуваат со тебе”. Која е целта на оваа кампања?

Стефковски: „Проектите почнуваат со тебе“ всушност не е кампања, туку граѓански дијалог кој го започнавме со една јасна и многу важна цел – заедно со граѓаните да го креираме буџетот на Општина Гази Баба за 2026 година.

Нашиот пристап е едноставен: најдобро знае што треба да се направи оној што живее секојдневно со предизвиците, а тоа се граѓаните. Затоа целта на овој процес е токму народот да одлучува за идниот развој на општината – кои проекти се приоритет, што недостига во нивната населба и кои решенија ќе донесат најголем бенефит за заедницата. Можеби во минатото се создала перцепција дека функционерите се појавуваат меѓу граѓаните само за време на изборни кампањи, па затоа некому му изгледа необично што ние продолжуваме активно да бидеме на терен и после изборите. Но тука е суштинската разлика: ние не сме со народот само пред избори – ние сме со народот секој ден. Го слушаме, разговараме, собираме идеи, забелешки, предлози и заедно ги дефинираме вистинските приоритети. Од народот произлегуваат и најдобрите идеи и најточните решенија на локалните проблеми.

„Проектите почнуваат со тебе“ е наш начин да покажеме дека општината не се води од кабинет, туку по улиците, маалата, населбите и селата, со граѓаните. Тоа е нов модел на управување, модел во кој заедно, транспарентно и отворено ја планираме иднината на Гази Баба.

КУРИР: Безмалку еден месец и Градот Скопје има нов градоначалник. Како оди комуникацијата сега со градската администрација по години целосна несоработка?

Стефковски: Новиот градоначалник на Скопје, Орце Ѓорѓиевски го познавам долго време, заедно бевме уште од Унијата на Млади сили во ВМРО-ДПМНЕ. Во овој период имавме неколку средби, го активираше и координативното тело на градоначалници и она што може да се забележи е неговата волја за комуникација и реализација на проекти во сите општини во Скопје. Зад нас имаме четири изгубени години, многу проекти останаа нереализирани поради споделените надлежности со градот, но пред нас е трка со времето. Ќе се обидеме со секојдневна посветена работа да реализираме многу проекти, а јавноста ќе биде сведок на тоа за многу скоро од денес.

КУРИР: Пред нас се новогодишните празници. Дали општина Гази Баба ќе блесне во новогодишно руво и дали ќе организирате новогодишен настан за најмладите?

Стефковски: Да, како и секоја година, и оваа зима Гази Баба ќе добие празнична, топла и весела атмосфера. Постапката за новогодишното украсување е веќе во тек и очекуваме кон средината на месецот општината целосно да заблеска во новогодишно руво – со украсени улици, плоштади и јавни површини кои ќе ја донесат празничната магија во нашето секојдневие. Што се однесува до најмладите, традицијата продолжува. Кон крајот на месецот ќе организираме новогодишен настан посветен токму на децата, исполнет со музика, забава и празнично расположение. Како и во изминатите четири години, Дедо Мраз ќе биде дел од настанот и ќе подели подароци за сите дечиња, со што сакаме да ја зачуваме детската радост и да создадеме убави спомени за најмладите жители на нашата општина. Целта ни е празничната атмосфера да ја почувствуваат сите граѓани и младите и возрасните и Гази Баба да блесне како вистинска новогодишна приказна.